“Бетоны олон улсын хурал-семинар” 6-р сарын 15-16-ны өдрүүдэд Улаанбаатар хотод амжилттай болж өндөрлөлөө. Энэхүү хурлыг салбартаа шинэчлэлийг хэрэгжүүлэн, дэлхийн стандартыг монголдоо бий болгохоор ажиллаж байгаа “Premium Concrete” компани болон ШУТИС, Монголын Бетон Судлаачдын холбоо, Монголын Барилгын инженерүүдийн холбоо, АНУ-ын Бетоны Институт хамтран зохион байгууллаа.

Хурал – семинар болон “Барилгын салбарын норм стандартын тогтолцооны шинэчлэлт” сэдэвт дугуй ширээний уулзалтад зохион байгуулагчдаас гадна Америк, Швейцарь, Тайвань, Япон, Солонгосын эрдэмтэн судлаачид ирж оролцон, өөрийн орны бетон цутгалтын туршлагаас монголын барилгын компаниудын төлөөлөлтэй хуваалцлаа. Олон улсын стандартын дагуу чанартай бетоныг хэрхэн үйлдвэрлэх талаар туршлага солилцоход чиглэсэн хурал-семинарт 100 гаруй компанийн 200 гаруй инженер техникийн ажилтнууд оролцжээ.

Хурал - семинараар хүйтний улиралд бетон хольцыг хэрхэн бэлтгэх, идэвхит эрдэс нэмэлтийг ашиглаж геополимер төрлийн холбогч гаргах боломжийн тухай, өндөр үзүүлэлттэй бетоныг хэрхэн гаргаж авах, Монголд газар доорх барилга байгууламжийг хөгжүүлэх, барилгын хуучин бүтээц, хаягдлыг дахин боловсруулах, бетоны бат бэхийн өсөлтөнд арчилгаа чухал болох тухай зэрэг мэргэжлийнхний хувьд байнга сайжруулалт шаардагддаг олон асуудлаар оролцогчид санал бодлоо хуваалцаж, туршлага солилцсон юм.

Барилгын компанийн төлөөлөгчид энэ өдрүүдэд мэргэжлийн ур чадвараа дээшлүүлж, бүтээгдэхүүний чанарт нөлөөлөхөөр сүүлийн үеийн судалгаа, шинжилгээний үр дүнтэй танилцаж, үйл ажиллагаандаа хэрэгжүүлэх боломжийн талаар мэдээлэлтэй болсондоо,  бусдадаа уншуулах гарын авлагатай буцсандаа олзуурхаж байлаа. Тэд сурч мэдсэн дэвшилтэт бүхнээ үйл ажиллагаандаа хэрэгжүүлнэ, ингэснээр барилгын чанарт ахиц гарч, салбарынхаа хөгжлийг түргэсгэх нь дамжиггүй. Сургалт-семинарын ач холбогдол үүнд оршиж байна.

Зөвхөн сайн бүтээгдэхүүн үйлдвэрлэхийг чухалчилаад зогсохгүй, салбарынхаа хөгжилд өөрийн гэсэн бодьтой хувь нэмрээ оруулж, нийгмийн хариуцлагаа хэрэгжүүлж байгаа “Премиум Конкрет” компани нь бетоны чанарыг сайжруулахын тулд АНУ-ын Бетоны институт болон ШУТИС-ийн эрдэмтэй багш нартай байнга хамтран ажилладаг. Тэд эрдэмтэн, судлаачдыг судалгаа, шинжилгээ, туршилт хийх боломжоор ханган ажиллаж, дэлхийн технологийг Монголдоо нэвтрүүлж байна. Үүний нэг жишээ нь тус компаниас Америкийн Бетоны Интитутын эрдэмтэн, зөвлөх Лук Снеллийг урьж авчиран, өөрийн лаборторийн инженер, техникийн ажилтнуудад сургалт авчээ. Бетоны талаар мэргэшсэн энэ эрхэм  6 сарын 12-14-ны өдрүүдэд Монголын барилгын салбарынханд бетоны хольц, агаар оруулсан бетон, бетоны арчилгаа, бетоныг хэрхэн нягтаршуулах зэрэг олон сэдвээр, онол практикт шалгарсан аргуудаар  лекц хичээл заан, оролцогчидтой хамтран лабораторийн туршилт хийсэн нь үр дүнтэй болжээ.

“Премиум Конкрет” компанийн зүгээс “Бетоны олон улсын хурал-семинар”-ыг жил бүр зохион байгуулахаа зарласан бөгөөд энэ чиглэлээр үйл ажиллагаа явуулдаг барилгын компаниудад олон улсын туршлагыг практик дээр нь судлах боломжийг олгож байгаагаараа барилгын салбарынхны талархлыг хүлээж байна.