Барилгын чанар бетоны чанараас шалтгаалдаг. Их хотод өнгө нэмэн байгаа тэнгэр баганадсан гоёмсог барилгууд бүгд л сайн чанарын бетон зуурмаг шаарддаг. Тиймээс бетон үйлдвэрлэгч компаниуд бүтээгдэх үүнийхээ чанарт байнга анхаарал тавьж, шинэ дэвшилтэт бүхнийг үйл ажиллагаандаа нэвтрүүлж, туршилт, судалгаа хийж байгаа билээ. Тэдгээрийн нэг “Премиум Конкрит” ХХК-ийн хамт олон бетоны нэмэлт бодис үйлдвэрлэлтээрээ БНХАУ-д тэргүүлэгч компанийн мэргэжилтнүүдтэй хамтран 8-р сарын 15-20-ны өдрүүдэд өөрийн лабораторидоо бетоны уян налархайг нэмэгдүүлэх туршилт, судалгааг хийлээ. Тушилтад оролцохоор тус компанийн борлуулалтын албаны дарга Qinngpei Ma, мэргэжилтнүүдийнхээ хамтаар ирсэн юм. Тэдэнтэй цөөн хором ярилцсанаа та бүхэнд хүргэж байна.

- Энэ туршилтыг хийснээр гарах үр дүн, ач холбогдол нь юундаа байна вэ?
- Бетоныг уян налархайжуулах нэмэлт бодис бүхий энэхүү туршилтыг хийснээр бетоны бат бэхийг дээшлүүлж, маркыг нэмэгдүүлэх боломжтой юм. Мөн бетоныг помпоор өндөрт шахахад илүү хялбар болохоос гадна бетоны чийгшлийн хувь хэмжээг тодорхой хэмжээнд барьж, цементний ус нэвтрүүлэх чанарыг бууруулдаг. Товчоор хэлбэл, чанарын дэвшил гарахаас гадна цемент, усны хэрэглээ багасна.

- Ирээд удаагүй ч Mонголын барилгын салбарын хөгжлийг мэргэжлийн хүний хувьд хэрхэн дүгнэж байна вэ?
- “Премиум Конкрит” компанийн хамтран ажиллах хүсэлтийн дагуу Улаанбаатар хотод ирээд онгоцны буудлаас л хотын төв орох замдаа барилгын салбарын хөгжилтэй танилцсан гэж хэлж болно. Монголд өндөр барилгууд ихээр баригдах цаг үеийн шаардлага, хэрэгцээ байгаа нь шууд харагдсан. Өндөр барилга барихад бетоны чанар сайн байх хэрэгтэй. Энэ тал дээр монголын барилгын салбарынхан амжилтанд хүрч чаджээ. Яг үнэндээ бид энд ирэхдээ өөр бодолтой байсан. Монголд өндөр маркын бетон зуурмаг шаардлагатай гэж бодоогүй. Гэтэл өндөр маркын бетон зуурмагийг барилгын компаниуд шаардаж, Премиум Конкрит компани энэ бүхнийг судалгаа, шинжилгээ, салбарынхаа сүүлийн үеийн ололтод тулгуурлан хийж чадаж байгаа нь гайхал төрүүлсөн. Бидэнд хамтарч ажиллах боломж илүү их байгаад бид баяртай байна.