Хүйтэн сэрүүний улиралд бетон үйлдвэрлэх боломжтой болно.
Amartuvshin
2019-11-05
Барилгын ажлыг улирлын чанартай гэдэг. Урин дулаан цагтай хамт барилгын ажил эхэлж, хүйтэн сэрүүн болонгуут бетон зуурмаг үйлдвэрлэх боломжгүй болдог тул барилгын ажил зогсдог. Иймд гадны улсуудад жилдээ багтан дуусдаг барилгууд Монголд он дамнан баригддаг.
Харин одоо улирлаас хамааралгүйгээр бетон зуурмаг үйлдвэрлэх зориулалттай, орчин үеийн шилдэг технологи бүхий, барилгын салбарын хөгжилд хурд нэмсэн шинэ үйлдвэр ашиглалтанд орсон тухай сайхан мэдээг танд дуулгая.
Үйл ажиллагааныхаа цар хүрээгээр Монголын бетоны хөгжлийн чиг хандлагыг тодорхойлогч гэж хэлж болох “Премиум Конкрит“ ХХК нь сэрүүний улирал болох 3 болон 11 сард бетон үйлдвэрлэх боломжтой үйлдвэрийг ашиглалтанд оруулаад, туршилтын ажлаа эхэлжээ. Энэхүү бүрэн автомат шинэ үйлдвэр нь цагт 70 м.куб бетон зуурмаг үйлдвэрлэх хүчин чадалтай, үзелийн хэсэгтээ нэмэлт дулаалгатай, явуулаар барилгын талбайд очиж ажиллах боломжтой, бүх техник, технологи нь хамгийн сүүлийн үеийн европ тоног төхөөрөмжөөс бүрдсэн аж.
Шинэ үйлдвэр ашиглалтанд орсноор тус компанийн бетон зуурмагийн үйлдвэрийн хүчин чадал цагт 190 м.куб болохын зэрэгцээ аль нэг үйлдвэрт нь доголдол гарахад нөгөө үйлдвэр нь үйл ажиллагааг тасралтгүй үргэлжлүүлэх давуу талтай юм байна.
Хүйтэн сэрүүний улиралд тохирсон бетон зуурмагийн энэхүү үйлдвэрийг байгуулахдаа Америкийн Бетоны Институтын эрдэмтэн, зөвлөх Лук Снеллийг урьж авчиран, сургалт туршилтуудыг зохион байгуулжээ. Хүйтний улиралд бетон зуурах талаар мэргэшсэн энэ эрхэм тус компанитай хамтран ажиллаж, хүйтэн сэрүүний улиралд бетон зуурмаг хийх, бетоны хольц, агаар оруулсан бетон, бетоны арчилгаа, бетоныг хэрхэн нягтаршуулах зэрэг олон сэдвээр, онол практикт шалгарсан аргуудаар лекц хичээл заан, мэргэжилтнүүдтэй хамтран лабораторийн туршилт хийсэн нь үр дүнтэй болсон тухай өмнө мэдээлж байсан билээ.
Хүйтэн сэрүүний улиралд ч барилгаа барих юмсан гэсэн бодол тээдэг барилгын салбарынхан энэхүү үйлдвэрийг улирлаас шалтгаалахгүйгээр ажиллах хугацааг нь уртасгах боломж олгосон, ажлын бүтээмжийг нэмэгдүүлсэн, цаашлаад салбарынхаа хөгжилд мэдэгдэхүйц хурд нэмсэн бүтээн байгуулалт боллоо хэмээн дүгнэж байна.
“Премиум Конкрит” компанийн тухай товч танилцуулахад тус компани нь ZOOMLION—CIFA компанийн цагт 120 м.куб бетон зуурмаг үйлдвэрлэх хүчин чадалтай үндсэн үйлдвэр, лаборатори, стандартын шаардлага хангасан түүхий эд, тээврийн хэрэгслүүдтэй. Мөн үйл ажиллагаандаа Канад улсаас оруулж ирсэн IBB багажийг миксер машинууддаа байрлуулж, түүний тусламжтайгаар бетоны хэмжээ, нягт, конусын суулт зэргийг үнэн зөвөөр тодорхойлдог болсноор харилцагч байгууллагуудаасаа өндөр үнэлгээ авч байна.
"Өдрийн сонин". 2012 он 08 сар 01. 5-р нүүрт