Барилгын салбар эрчимтэй хөгжихийн хамт чанарын асуудал хэн бүхний сэтгэлийг зовоож байгаа нь нууц биш. Гэхдээ салбартаа шинэчлэл, сайжруулалтыг хийж, инновацийг нэвтрүүлэхээр эрэл хайгуул хийн, үйл ажиллагаандаа нэвтрүүлж байгаа олон компаниуд байдаг нь талархалтай. 

Тэдгээрийн нэг “Премиум Конкрит” компанийн удирдлагын баг АНУ-ын Лас Вегас хотноо 2 сарын 3-6-ны өдрүүдэд “World of Concrete’’ \WOC\ үзэсгэлэн яармагт оролцон, аяны богц дүүрэн иржээ.

“World of Concrete’’ үзэсгэлэн яармаг нь АНУ-д жил бүр уламжлал болон зохион байгуулагддаг бөгөөд бетон зуурмагийн болон чулуу, тоосго үйлдвэрлэгчдэд орчин үеийн технологийн шийдэл болсон тоног төхөөрөмж, хангамжийн болон аюулгүй ажиллагааны бүтээгдэхүүнүүдийг санал болгодог юм. 

Энэхүү үзэсгэлэн яармаг нь оролцогч байгууллагуудад ашигтай ажиллах, бизнесээ амжилттай хөгжүүлэх, шинэ харилцагчтай болох, хамгийн сүүлийн үеийн технологийн дэвшилтэт бүтээгдэхүүнийг үйлдвэрлэлдээ нэвтрүүлэх боломжийг олгодог учраас дэлхийн өнцөг бүрээс барилгын салбарын шилдэг үйлдвэрлэгчид зорин очдог аж.

“Премиум Конкрит” компанийн хамт олон өнгөрсөн онд “World of Concrete’’ үзэсгэлэн яармагаас бетоны суултыг миксерт нь хэмждэг IBB багажтай танилцан үйлдвэрлэлдээ нэвтрүүлсэн билээ. 

IBB багажийг миксер машиндаа байрлуулснаар бетоны хэмжээ, температур, нягт, конусан суулт, миксерийн эргэлтийн тоо, хөдөлгөөнт чанар зэргийг тухайн газар дээр нь шууд тодорхойлон харуулах боломжтой болсноор харилцагчдадаа бетон зуурмагтаа сэтгэл хангалуун байх боломжийг олгосон юм.

Энэ жилийн хувьд миксер угаах тоног төхөөрөмжийг онцолж, үйлдвэрлэлдээ нэвтрүүлэхээр судлаад ирсэн байна. Байгальд ээлтэй технологи бүхий энэ төхөөрөмж нь цэвэр усны хэрэглээг багасгахын хамт миксерийн торхийг бүрэн цэвэрлэдэг сайн талтай юм байна. Учир нь миксер бүрэн цэвэрлэгдсэнээр бетоны чанарт нөлөөлөх дам хүчин зүйл үгүй болох аж. 

Ч.Оюунчимэг